asal usul danau maninjau dalam bahasa minangkabau

 asal-usul danau maninjau

Alkisah, disabuah desa di daerah Sumatera Barat hiduiklah 10 urang basaudara. 9 diantaronyo laki-laki, sadangkan yang paliang bungsu adolah padusi, yang banamo Siti Ransani/Sani. mereka kasadonyo adolah anak yatim piatu. Suatu hari, mamaknyo datang jo anaknyo, Giran. Sajak partamo kali Giran jo Sani basuo, inyopun jatuah cinto pandangan partamo. Sajak partamuan itu Giran jo Sani acok basuo. Dan Giran pun manyatoan parasaannyo kapado Sani. Dan sani pun marasoan hal yang samo, hinggo akhirnyo mereka bapacaran. Suatu hari  diadoan patunjuakan pencak silat yang diadoan dibalai desa. Patandiangan awal dimulai jo kakak suluang sani, Kukuban. Malawan pasilek kampuang sabalah . dan Kukuban pun maraih kamanangan. Sampai akhirnyo tibo giliran Giran. Kukuban dan Giran adolah pasilek nan tangguah. Tapi, Kukuban mandapek sarangan nan tiado hanti dari Giran, Kukuban pun kalah dan kaki kirinyo patah.

Babarapo bulan kamudian, mamak dan Giran ka rumah sani untuak malamar sani. 8 kakak sani satuju, tapi Kukuban indak satuju karano Kukuban masih dendam ka Giran. Sani yang mandanga barancana untuak basuo jo Giran di pinggia sungai. Tibo-tibo kaki Sani kanai duri dan Giran pun capek maubekannyo. Tanpo inyo sadari, banyak panduduak yang maawasi tindak tanduaknyo dari tadi. Panduduak mangiro inyo baduo malakuan hal yang indak pantas untuak dilakuan urang yang alun nikah. Inyo baduopun dibaok ka balai adat.dan  mereka haruih dihukum, dibuang ka gunuang tinjau, nan konon katonyo untuak mambuang sial.

Panduduak basamo- samo maantaan Giran jo Sani ka kawah gunuang tinjau. Sampai di Gunuang Tinjau,  Giran pun bado’a “kalau kami memang salah mako badan kami akan hancua dikawah gunuang ko. Tapi kalau kami indak salah mako, saluruah isi kawah ko akan hancua dan bujang sambilan akan barubah manjadi lauak. Kabuakanlah do’a hamba ko ya tuhan”. Lalu giran jo sani malompek ka kawah .sado urang yang maliek cameh mananti apo nan tajadi. Tibo-tibo saluruah isi kawah tu kalua maancuaan sadonyo. Sado urang nan ado di sinan indak dapek manyalamaikkan diri. Bujang sambilan pun barubah manjadi lauak.

Konon latusan gunuang tinjau tu manyisoan kawah nan laweh nan lamo kalamoan barubah manjadi danau. Oleh panduduak sakitar diabadian manjadi namo danau ,Danau Maninjau. Samantarao namo tokoh yang terlibat diabadikan manjadi nama nagari di sakitar Danau Maninjau, Contohnyo Tanjuang Sani, Sikudun, Bayua, Koto Malintang, Koto Kaciak, Sigalapuang, Balok, Kukuban, Sungai Batang Dan Sigiran.